सुरक्षित आवास, प्रत्येक नागरिकको अधिकार' भन्ने मूल नाराका साथ नवौं नेपाल घरजग्गा तथा निर्माण प्रदर्शनी आगामी असोज १ देखि ४ गतेसम्म काठमाडौंको भृकुटीमण्डपमा आयोजना हुने भएको छ।
'सिजी प्रोपर्टिज नवौं नेपाल घरजग्गा तथा निर्माण प्रदर्शनी–२०८३' नेपाल जग्गा तथा आवास विकास संघ र नेपाल जग्गा तथा आवास विकास महासंघको संयुक्त आयोजनामा हुन लागेको हो।
नेपाल चेम्बर अफ कमर्सको ७५औं हिरक जयन्तीका अवसरमा चेम्बरको सहकार्यमा आयोजना हुने प्रदर्शनीको व्यवस्थापन सिया इभेन्ट एसोसिएट्स प्रालिले गर्नेछ।
प्रदर्शनीमा नेपालका विभिन्न स्थानका साथै छिमेकी मुलुक भारतबाट समेत गरी १०० भन्दा बढी स्टल रहने आयोजकले जनाएको छ।
आयोजकका अनुसार सबै स्टल बुकिङ भइसकेका छन्।
प्रदर्शनीमा अपार्टमेन्ट, जग्गा विकास आयोजना, सिमेन्ट, स्टिल, काठ, सिसा, पेन्ट्स, सेनिटरी, विद्युतीय उपकरण, इन्टेरियर डिजाइन, सौर्य ऊर्जा, रेन वाटर हार्भेस्टिङ तथा फोहोर व्यवस्थापनलगायतका सामग्री तथा प्रविधि राखिनेछन्।
यसपटक प्रदर्शनीलाई वातावरणमैत्री बनाउने उद्देश्यले डिजिटल स्ट्यान्डी, इलेक्ट्रोनिक कियोस्क तथा भर्चुअल रियालिटी (भिआर/एआर) प्रविधिको प्रयोग गरिने आयोजकले जनाएको छ। यसबाट प्रदर्शनीलाई 'पेपरलेस' बनाउने लक्ष्य राखिएको छ।
प्रदर्शनीका संयोजक रोशन भोयध्योले सुरक्षित, व्यवस्थित तथा वैज्ञानिक वस्ती विकासमार्फत दिगो सहरीकरण प्रवर्द्धन गर्ने उद्देश्यले प्रदर्शनी आयोजना गरिएको बताए।
नेपाल चेम्बर अफ कमर्सका वरिष्ठ उपाध्यक्ष दिपक मल्होत्राले घरजग्गा व्यवसायमा देखिएको समस्या समाधानका लागि नीतिगत सुधार आवश्यक रहेको बताए।
घरजग्गा व्यवसायमा देखिएको सुस्तताले समग्र अर्थतन्त्रमा समेत प्रभाव परेको भन्दै उनले घरजग्गा कारोबारमा लागू विभिन्न शुल्क तथा करका विषयमा पुनर्विचार गर्नुपर्ने धारणा राखे।
उनले घरजग्गा क्षेत्रलाई चलायमान बनाउन कर्जा–मूल्य अनुपात (एलटिभी) ७० प्रतिशत पुर्याउनुपर्ने माग गरे।
बैंकिङ क्षेत्रमा तरलता सहज हुँदै गएको र ब्याजदर घट्दो क्रममा रहेकाले घरजग्गा क्षेत्रमा लगानीको वातावरण सुधार गर्नुपर्ने उनको भनाइ थियो।
कार्यक्रममा नेपाल जग्गा तथा आवास विकास महासंघका अध्यक्ष विष्णुप्रसाद घिमिरेले घरजग्गा व्यवसाय अर्थतन्त्रको मेरुदण्डका रूपमा रहेको बताए।
क्षेत्रलाई व्यवस्थित र चलायमान बनाउन निजी क्षेत्र तथा सरकारबीच सहकार्य आवश्यक रहेको उनको भनाइ थियो।
नेपाल जग्गा तथा आवास विकास संघका अध्यक्ष दिपक कुँवरले भूकम्प, कोभिड–१९ महामारी तथा आर्थिक शिथिलताबीच पनि घरजग्गा तथा निर्माण क्षेत्रले निरन्तरता पाउँदै आएको बताए।
प्रदर्शनीले घरजग्गा कारोबारका साथै निर्माण क्षेत्रसँग प्रत्यक्ष तथा अप्रत्यक्ष रूपमा जोडिएका उद्योग, व्यवसाय र श्रमशक्तिलाई समेत समेट्ने उनले बताए।
उनका अनुसार प्रदर्शनीमार्फत करिब १ करोड ४० लाख रूपैयाँ आसपासको मूल्यमा घर उपलब्ध हुने विकल्पसमेत उपभोक्तासमक्ष प्रस्तुत गरिनेछ।
प्रदर्शनी अवधिमा भूकम्प प्रतिरोधी घर निर्माण तथा वास्तुशास्त्रसम्बन्धी विज्ञबाट निःशुल्क परामर्श दिइनेछ।
जलवायु परिवर्तन, विपद्–प्रतिरोधी पूर्वाधार, सुरक्षित बस्ती पुनरुत्थान तथा सार्वजनिक–निजी साझेदारीलगायतका विषयमा नीति निर्माता, सरकारी अधिकारी, निजी क्षेत्रका प्रतिनिधि, इन्जिनियर तथा आर्किटेक्टको सहभागितामा सेमिनार तथा प्यानल छलफल आयोजना गरिनेछ।
त्यस्तै, नयाँ व्यवसाय सुरू गरेका तथा चुनौती सामना गरिरहेका युवा उद्यमीलाई प्रोत्साहन गर्ने उद्देश्यले खुला आह्वान गरी छनोट भएकालाई निःशुल्क तालिम तथा परामर्श प्रदान गरिने आयोजकले जनाएको छ।
सन् २००९ देखि निरन्तर आयोजना हुँदै आएको प्रदर्शनीले भूकम्प, कोभिड महामारी तथा आर्थिक शिथिलताका बाबजुद निरन्तरता कायम राखेको आयोजकको भनाइ छ।
यसपटकको प्रदर्शनीमा ६५ हजारभन्दा बढी अवलोकनकर्ता आउने अपेक्षा गरिएको छ।
बैंकिङ क्षेत्रमा तरलता सहज तथा ब्याजदर घट्दो क्रममा रहेकाले घरघडेरी छनोट, वित्तीय निर्णय तथा सुरक्षित लगानीका विषयमा जानकारी लिन प्रदर्शनी उपयोगी हुने आयोजकको विश्वास छ।
आयोजक संस्थाले व्यावसायिक गतिविधिसँगै सामाजिक उत्तरदायित्वलाई पनि प्राथमिकता दिएको जनाएको छ।
भदौ १० गते रसुवामा आएको बाढीबाट प्रभावित परिवारका लागि खाद्यान्न, लत्ताकपडा, औषधि तथा ड्रोन उपकरणसहित राहत सामग्री पठाइसकेको र प्रधानमन्त्री दैवी प्रकोप राहत कोषमा ३१ लाख रूपैयाँ नगद हस्तान्तरण गरिएको आयोजकले जनाएको छ।
-1746009348.jpg)
